Anxo Fariña visita a nosa biblio!

Hoxe o alumnado de 3º a 6º de Primaria tivo a oportunidade de participar nun encontro moi especial co autor Anxo Fariña, quen visitou a nosa biblioteca para falar da súa obra A escola robot, publicada por Edicións Xerais de Galicia. Esta actividade enmárcase dentro das iniciativas de fomento da lectura, ofrecendo ao alumnado unha experiencia directa co mundo da creación literaria.

Durante a sesión, o autor explicou como naceu a historia e como foi desenvolvendo as personaxes, combinando imaxinación e reflexión sobre temas actuais como a presenza da tecnoloxía na vida cotiá. Ademais, Anxo Fariña amosou tamén parte do seu proceso creativo como ilustrador, o que espertou aínda máis o interese dos nenos e nenas, que puideron ver de primeira man como se constrúe unha historia desde a idea inicial ata o libro final.

Coñecíamos moi ben a historia, e foi un gustazo escoitar a Anxo falar das persoanaxes do libro. O alumnado escoitouno con moita atención e participou activamente, formulando preguntas e compartindo as súas impresións sobre o libro.

 
Para rematar, agasallounos cunha fantástica ilustración que lle fai un guiño ao seu libro A escola robot, a viaxe espacial Artemis II ao redor da Lúa que está acontecendo agora mesmo e a nosa compañeira Candela!

Que fermosura!!!

O encontro resultou moi enriquecedor e motivador, contribuíndo a achegar a lectura ao alumnado dun xeito dinámico e participativo, e reforzando o papel da biblioteca como espazo de aprendizaxe, creatividade e encontro coa cultura.

Happy St. Patricks's day!

O 17 de marzo festexamos o patrón de Irlanda, unha festa chea de cor, música e tradición que nos leva ata esta terra verde, onde ten a súa orixe. 

O alumnado de sexto preparou actividades para todo o cole. Fixeron un obradoiro activo no que había que poñerlle o sombreiro ao "Leprechaun" (trasno irlandés) e quitarlle moediñas de ouro para encestar no caldeiro. 

Tamén practicaron bailes propios da data, maquilláronse e crearon pulseiras de trebo ou complementos para posar no photocall. 

A través destas actividades tinguímonos de verde e coñecimos a historia de San Patricio, unha figura que forma parte do imaxinario cultural irlandés. Unha oportunidade para descubrir outras culturas, aprender novas historias e celebrar a diversidade, facendo da escola un espazo aberto ao mundo, á curiosidade e á convivencia. Estivo ben divertido!

Grazas Teacher Lucía por facelo posible!

"Macín e os Mega lectores" len O meu gato é un poeta.

Este mes, aproveitando a proximidade do Día da Poesía (21 de marzo) o club de lectura de 5º EP "Macin e os Megalectores" limos a obra de Fran Alonso O meu gato é un poeta. Despois de comer estivemos falando sobre o libro, que poema nos gustou máis de entre todos os que aparecen na obra, se nos resultou doado ou complicado ler poesía etc. Despois, cada un de nós recitou un dos poemas do libro, cada quen o que máis lle gustou ou o que máis lle chamou a atención. Despois, divididos en parellas e grupos de tres, decidimos facer os nosos poemas ao estilo do libro, isto é realizando con eles un caligrama. Foi unha actividade moi interesante que nos permitiu explorar a nosa creatividade individual, ao tempo a nosa capacidade de traballar en equipo.

Unha vez rematados os caligramas, cada equipo recitou ao resto do club o seu poema.

Cando rematamos, realizamos un pequeno mural coas composicions de cada grupo para colgar na biblioteca.

Xa asoma a primavera na nosa horta! - marzo

A planificación da horta escolar, xunto coa compostaxe e a simplificación do rego, pode entenderse como unha pequena introdución práctica á permacultura, onde cada decisión busca harmonía e equilibrio co medio. 

Organizar os cultivos segundo as estacións, aproveitar os restos orgánicos para crear compost e deseñar sistemas de rego eficientes ensina ao alumnado a observar, a anticipar e a coidar os recursos con responsabilidade. 

Deste xeito, a horta convértese nun espazo intelixente e sostible, no que nada se desperdicia e todo cumpre unha función, promovendo unha aprendizaxe consciente, creativa e comprometida co respecto pola natureza.

A liña conductora de hoxe foi o compost. Démoslle unha boa limpeza de follas malas e herbas non desexadas no invernadoiro que foron ás composteiras. Tentamos peneirar o compost para incorporalo aos bancais.

Colleitamos nabizas, rúcula e acelgas.

Deixamos plantados tomateiras, pementos, leitugas, brécoles, perixel, cilantro e algunhas remolachas e consoldas nos bancais.

Fixemos espiches de sálix "de colección" e salgueiro bravo nos laterais do invernadero para conter o mega hotel de insectos. A ver os que tiran para diante!

E planificamos a automatización do rego polo teito do invernadoiro a través de difusores, para simplificar esta tarefa. De momento, hoxe tocou regar coa mangueira!

Que sucederá na próxima xornada de horta?

O profesorado de Maciñeira remata a formación de Radio na Biblio

Hoxe, o profesorado de Maciñeira tivemos a última sesión de formación en Radio na Biblio con Isidoro Valerio, grazas ao Plan de Formación Permanente do Profesorado, dentro do itinerario de Polos Creativos, coordinado polo Centro de Formación e Recursos de Ferrol. Nesta última sesión repasamos todos os contidos aprendidos nas sesións anteriores, ademais de resolver dúbidas concretas do profesorado, unha vez que empezamos proñer en práctica as aprendizaxes desenvolvidas grazas a esta formación. Desde aquí queremos agradecera Isidoro Valerio a súa paciencia e a súa profesionalidade, así como ao CFR pola súa coordinación neste aspecto. Esperamos, grazas a estes coñecementos, que a nosa Radio Belelle vaia crecendo pouco a pouco e podamos compartila con toda a comunidade educativa.

"@s amig@s de Macin" len Alma de Elefante

Este mes, o libro que limos no club de lectura de 6º EP "@s amig@s de Macín" foi Alma de elefante, de Andrea Maceiras ilustrado por Jordi Solano. Xa é o segundo libro que lemos dela e tivemos a oportunidade de coñecela o ano pasado na súa visita á nosa biblioteca así que collémolo con moitas ganas. 

Foi un libro que nos deixou con moitas preguntas e, na tertulia habitual coméntamolas entre todos os membros do club. Cada un e cada unha de nós comentamos as nosas impresións sobre a obra e sobre os temas que nela se tratan, así como das partes da historia que máis ou menos lles gustou, os momentos en que sentiron tensión ou nervios, pero tamén sobre as características e as actitudes dos protagonistas en diferentes momentos da narración. 

A verdade é que foi unha das tertulias nas que máis interviñemos pois tiñamos moito que dicir. Ademais, ao fío do espírito da propia obra, cada quen quixo compartir co grupo coa alma de que animal se sentía identificado ou identificada e por que o sentía así. Foi un momento moi especial.

Posteriormente, en equipo, realizamos un mural co mapa que imaxinamos que seguiron Lawen e Suy para ir a Ru desde Sat Naapa. Foi unha tarefa moi completa, recordando todos os lugares polos que pasaron e o que lles aconteceu alí e imaxinando os camiños que seguiron para ir dun lugar a outro. Como adoitamos facer cando traballamos en equipo debatimos, chegamos a acordos, establecimos diferentes tarefas e fomos realizándoas de forma ordenada.

O resultado quedou realmente fermoso, non vos parece?

Para finalizar, fixemos a devolución dos libros e o empréstito dos seguintes, Erin e o lobo, de Érica Esmorís.