Día Mundial do Medio Ambiente: aprendendo da abundancia da natureza na nosa horta escolar

Con motivo da celebración do Día Mundial do Medio Ambiente, vivimos unha xornada moi especial na nosa horta escolar e no invernadoiro. Foi unha mañá chea de aprendizaxes, traballo en equipo e reflexións sobre a importancia de coidar a natureza e respectar os seus ritmos.

A actividade xirou arredor dunha idea fundamental: cando respectamos os ciclos das plantas e facemos un uso responsable dos recursos, a natureza devólvenos abundancia. Grazas ao traballo realizado ao longo do curso, puidemos recoller unha gran cantidade de produtos da horta. Colleitamos leitugas, acelgas, mini coles e outras verduras que puidemos aproveitar para nós. 

Pero tamén aprendemos que non todo o que se recolle remata na mesa: unha parte importante da colleita, xunto coas herbas retiradas e as podas dos tomates máis asilvestrados, foi destinada á compostaxe.

Esta foi unha oportunidade perfecta para falar do ciclo dos nutrientes e da importancia de transformar os restos orgánicos en novo alimento para a terra. Comentamos tamén o correcto uso das composteiras, lembrando que debemos encher completamente unha antes de comezar coa seguinte para garantir un bo proceso de descomposición. Ademais, explicamos a necesidade de cubrir cos restos de herba os residuos orgánicos das merendas para evitar a aparición de mosquitos e favorecer unha compostaxe equilibrada.

Outro dos momentos máis interesantes foi observar como a propia natureza nos sorprende. Replantamos tomateiras que naceran de maneira espontánea nunha zona da horta para trasladalas a outras onde aínda non apareceran. Tamén comprobamos que algunhas das acelgas recollidas procedían de sementes que caeran ao chan en tempadas anteriores e que volveron medrar por si soas. Un exemplo perfecto de como a vida continúa cando deixamos espazo para que os procesos naturais sigan o seu curso.

Ao longo da xornada tamén falamos, adaptándonos á idade de cada grupo, da cadea trófica e das relacións que existen entre os distintos seres vivos do ecosistema da horta.  Comprendemos que cada planta, insecto ou animal ten un papel importante e que todos forman parte dun mesmo equilibrio.

No invernadoiro vivimos unha experiencia moi especial: puidemos observar como funciona o sistema de rega e experimentar a sensación de que “chove” cando nós o necesitamos. Esta actividade serviunos para reflexionar sobre o valor da auga e a importancia de empregala de forma responsable.

Para rematar, cos grupos maiores xurdiu unha proposta solidaria e sostible: preparar paquetes de cinco plantas de tomate para poñer á disposición das familias e da comunidade educativa. A idea é compartilas mediante unha pequena achega voluntaria, promovendo así o coidado das plantas e a difusión da nosa experiencia hortícola.

A xornada concluíu cunha fermosa lección: a abundancia multiplícase cando se comparte. Repartimos colleitas, repartimos plantas, repartimos coñecementos e, sobre todo, repartimos ilusión por seguir aprendendo da natureza e coidando do medio ambiente entre todas e todos.

Agradecémoslle un ano máis a Peibol o acompañamento brindado ao longo de todo o curso e agardamos vernos á volta do verán!!!

Feliz Día Mundial do Medio Ambiente! 🌱🌍💚