Pechamos o club de lectura de 5º e 6º de EP nunha sesión conxunta

Esta tarde pechamos, por este curso, o noso club de lectura “Maciñeira de Libros” nunha sesión conxunta dos clubs de 5º e 6º de Educación Primaria. Para celebrar o peche desde curso tan intenso en lecturas e actividades encargamos comida para compartir unha xornada do máis especial. Mentres esperábamos pola comida, o alumnado membro cubriu unha pequena enquisa de valoración para poder seguir mellorando no noso club de lectura.

Despois da sobremesa, gravamos entre todos e todas un novo podcast para Radio Belelle; neste caso, tratouse dun programa-tertulia en que o alumnado membro dos clubs compartiu as súas experiencias sobre o vivido neste curso e os seus desexos para o futuro. Foi unha conversa moi interesante e fermosa, onde saíron pensamentos e sentimentos  compartidos e, por suposto, unha chea de títulos de libros. Podedes escoitar o programa aquí.

Finalmente, o club de lectura de 5º de EP “Macín e os Megalectores” enterrou a cápsula do tempo que estiveron preparando na última sesión a raíz da lectura de O enigma de Sempreviva, de Andrea Maceiras. O alumnado de 6º de EP “@s amig@s de Macín” compartiu con eles e elas esta experiencia, recordando a súa propia do curso pasado.

As mestras que levamos este curso os clubs de lectura, Fátima e Lidia, estamos realmente satisfeitas e orgullosas das actividades realizadas e da implicación do alumnado e queremos agradecerlles que sempre estiveram dispostos e dispostas a todas as iniciativas que se nos ocorreron. Longa vida aos clubs de lectura!

Teatro radiofónico

Como sabedes, o Club de lectura "@s amig@s de Macín" realizou unha adaptación radiofónica da obra de teatro A letra pequena das cousas, de Jose Luis Baños de Cos, editado por Galaxia.

Contamos co permiso expreso da editorial tanto para a realización da adaptación como para a publicación da plataforma iVoox e no blog da biblioteca. Despois dunha edición básica, podedes escoitar o noso podcast desde xa!

Macín e os Megalectores len “O enigma de Sempreviva”

Este mes o club de lectura de 5º EP “Macín e os Megalectores” leron O enigma de Sempreviva, de Andrea Maceiras. Aproveitando o bo tempo que estamos a ter estes días, fixemos a sesión do club no patio de abaixo. 

Despois da comida, falamos do libro e da historia que conta, tamén das consecuencias que teñen no noso planeta as nosas consecuencias e como debemos procurar realizar accións que axuden a cuidar a natureza.

Fixemos un pequeno obradoiro de arte en que decoramos unhas pequenas macetas de arxila en que plantamos sementes de xirasol como as que aparecen na historia.

Para finalizar, pensamos un pouco no futuro e escribimos cartas para os nosos Eu de dentro de dez anos, así como tamén fixemos debuxos de cousas que queriamos meter na nosa propia cápsula do tempo.

“@s amig@s de Macín” len a última obra deste curso

Este último mes, o alumnado do club de lectura de 6º de Educación Primaria "@s amig@s de Macín" tivemos a nosa última lectura do curso e da etapa, posto que o curso que vén xa non estaremos no cole. Así, para celebrar a experiencia, no canto de compartir unha lectura, cada persoa membra do club tivo a sorte de ler unha obra literaria diferente. 

Os libros escollidos para esta última lectura foron: 

 - Douche a miña palabra, de Fran Alonso. 

- A señorita Bubble, de Ledicia Costas. 

- Conta nove estrelas, de Andrea Maceiras. 

- Dúas bágoas por Máquina, de Fina Casalderrey.

- Laia, a nena da illa, de Ánxela Loureiro. 

- Rapazas, de Agustín Fernández Paz. 

- Matilda, de Roald Dahl. 

- O Nicolasiño, de Goscinny e Sempé. 

Despois dunha comida campestre nas mesas do noso patio, fixemos a nosa tertulia literaria sentados no campo. Cada persoa membra do club presentou o seu libro e respondeu ás preguntas do resto.

Para finalizar a sesión fixemos un Knolling literario, unha prosposta creativa e persoal de cada persoa membra do club que, preparando con anterioridade unha serie de obxectos vencellados co libro (ou coa súa visión do libro) que trouxo á sesión do club e fixo unha fotografía con plano cenital incluíndo este libro e os obxectos dispostos a modo de "bodegón". Velaquí os resultados!

Aínda nos queda unha última sesión do club, a modo de despedida, que compartiremos co club de lectura de 5ºEP "Macín e os Megalectores".

“Macín e os Megalectores” len A escola robot

Este mes o Club de lectura de 5º de EP "Macín e os Megalectores" limos A escola robot, de Anxo Fariña. Ademais, tivemos a sorte de que puidemos coñecer ao autor e saber como era o seu proceso creativo, tanto coa ilustración como coa historia en xeral.

Despois de comer, estivemos a falar sobre a obra, as nosas impresións sobre a historia, as ilustracións, o final da historia, a experiencia de coñecer ao autor... A continuación, coñecimos o libro que nos toca ler o vindeiro mes, O enigma de Sempreviva, de Andrea Maceiras.

Para finalizar a sesión, construímos os nosos propios robots empregando os sets de Lego WeDo empregando as tablets para montalos e programalos. Gustounos un montón a experiencia!

“@s amig@s de Macín” len Erin e o lobo

Este mes, no Club de Lectura de 6º de Primaria "@s amig@s de Macín" limos "Erin e o lobo", de Érica Esmorís. Despois da comida, falamos do libro,das súas impresións, dúbidas sobre o final... tamén sobre o que era un epílogo dentro da narrativa dun libro, como foi a experiencia de coñecer a autora e o valor engadido dun libro cando está asinado pola súa autora ou ten un Ex-libris.
Entre todos, elaboramos un póster para animar a posteriores membros do club de lectura a ler o libro. Para finalizar a sesión xogamos a unha versión do xogo de mesa "Carreira de Letras" con tarxetas vencelladas coa historia da obra.

Anxo Fariña visita a nosa biblio!

Hoxe o alumnado de 3º a 6º de Primaria tivo a oportunidade de participar nun encontro moi especial co autor Anxo Fariña, quen visitou a nosa biblioteca para falar da súa obra A escola robot, publicada por Edicións Xerais de Galicia. Esta actividade enmárcase dentro das iniciativas de fomento da lectura, ofrecendo ao alumnado unha experiencia directa co mundo da creación literaria.

Durante a sesión, o autor explicou como naceu a historia e como foi desenvolvendo as personaxes, combinando imaxinación e reflexión sobre temas actuais como a presenza da tecnoloxía na vida cotiá. Ademais, Anxo Fariña amosou tamén parte do seu proceso creativo como ilustrador, o que espertou aínda máis o interese dos nenos e nenas, que puideron ver de primeira man como se constrúe unha historia desde a idea inicial ata o libro final.

Coñecíamos moi ben a historia, e foi un gustazo escoitar a Anxo falar das persoanaxes do libro. O alumnado escoitouno con moita atención e participou activamente, formulando preguntas e compartindo as súas impresións sobre o libro.

 
Para rematar, agasallounos cunha fantástica ilustración que lle fai un guiño ao seu libro A escola robot, a viaxe espacial Artemis II ao redor da Lúa que está acontecendo agora mesmo e a nosa compañeira Candela!

Que fermosura!!!

O encontro resultou moi enriquecedor e motivador, contribuíndo a achegar a lectura ao alumnado dun xeito dinámico e participativo, e reforzando o papel da biblioteca como espazo de aprendizaxe, creatividade e encontro coa cultura.

"Macín e os Mega lectores" len O meu gato é un poeta.

Este mes, aproveitando a proximidade do Día da Poesía (21 de marzo) o club de lectura de 5º EP "Macin e os Megalectores" limos a obra de Fran Alonso O meu gato é un poeta. Despois de comer estivemos falando sobre o libro, que poema nos gustou máis de entre todos os que aparecen na obra, se nos resultou doado ou complicado ler poesía etc. Despois, cada un de nós recitou un dos poemas do libro, cada quen o que máis lle gustou ou o que máis lle chamou a atención. Despois, divididos en parellas e grupos de tres, decidimos facer os nosos poemas ao estilo do libro, isto é realizando con eles un caligrama. Foi unha actividade moi interesante que nos permitiu explorar a nosa creatividade individual, ao tempo a nosa capacidade de traballar en equipo.

Unha vez rematados os caligramas, cada equipo recitou ao resto do club o seu poema.

Cando rematamos, realizamos un pequeno mural coas composicions de cada grupo para colgar na biblioteca.

"@s amig@s de Macin" len Alma de Elefante

Este mes, o libro que limos no club de lectura de 6º EP "@s amig@s de Macín" foi Alma de elefante, de Andrea Maceiras ilustrado por Jordi Solano. Xa é o segundo libro que lemos dela e tivemos a oportunidade de coñecela o ano pasado na súa visita á nosa biblioteca así que collémolo con moitas ganas. 

Foi un libro que nos deixou con moitas preguntas e, na tertulia habitual coméntamolas entre todos os membros do club. Cada un e cada unha de nós comentamos as nosas impresións sobre a obra e sobre os temas que nela se tratan, así como das partes da historia que máis ou menos lles gustou, os momentos en que sentiron tensión ou nervios, pero tamén sobre as características e as actitudes dos protagonistas en diferentes momentos da narración. 

A verdade é que foi unha das tertulias nas que máis interviñemos pois tiñamos moito que dicir. Ademais, ao fío do espírito da propia obra, cada quen quixo compartir co grupo coa alma de que animal se sentía identificado ou identificada e por que o sentía así. Foi un momento moi especial.

Posteriormente, en equipo, realizamos un mural co mapa que imaxinamos que seguiron Lawen e Suy para ir a Ru desde Sat Naapa. Foi unha tarefa moi completa, recordando todos os lugares polos que pasaron e o que lles aconteceu alí e imaxinando os camiños que seguiron para ir dun lugar a outro. Como adoitamos facer cando traballamos en equipo debatimos, chegamos a acordos, establecimos diferentes tarefas e fomos realizándoas de forma ordenada.

O resultado quedou realmente fermoso, non vos parece?

Para finalizar, fixemos a devolución dos libros e o empréstito dos seguintes, Erin e o lobo, de Érica Esmorís.

"Macin e os mega lectores" len A letra pequena das cousas

Durante este mes de febreiro, o alumnado do club de lectura "Macín e os Megalectores" limos A letra pequena das cousas, de José Luis Baños de Cos, ilustrado por Ana Tasende, que xa lera o alumnado do club de lectura de 6º EP anteriormente neste curso. 

Cando rematamos a comida, fixemos a nosa tertulia sobre a libro, que personaxe lles gustou máis, que diálogo recordaban mellor, etc. pero sobre todo se entenderon ben a historia e todo o trasfondo que trata. Dado que se trataba dunha obra de teatro, por parellas estivemos dramatizando as escenas que escollemos de entre as moitas do libro.

A continuacion, realizamos unha actividade súper interesante que nos encantou. Tratábase de, igual que na obra, coser unha mensaxe secreta, pero neste caso empregamos fío fluorescente. Así, a nosa mensaxe pode lerse na escuridade empregando unha luz negra. Cada un dos membros do club, nun anaco de tea e empregando un bastidor, cosimos unha letra, unha palabra, un símbolo... cada un o que decidiu. Despois, empregamos a luz engra na escuridade para descubrir as nosas mensaxes secretas. Foi unha pasada!

Finalmente, fixemos a devolución e o empréstito da seguinte lectura:O meu gato é un poeta, de Fran Alonso.

“@s amig@s de Macin” len A excursión a Cans

Durante o último mes, o club de lectura de 6º de EP "@s amig@s de Macin" limos o libro A excursión a Cans. Unha veciña de película, de Iria Misa, con ilustracións de Laura Suárez. Despois da comida, iniciamos a tertulia, como cada mes, sobre a súa opinión sobre o libro. Falamos de cal dos guións das curtametraxes lles gustou máis e por que, como foi a lectura, as dificultades que supuxo ter dous tipos de textos: narración e guións de cine.

Posteriormente, realizamos unha actividade en equipo convertindo un dos guións das curtametraxes da obra nunha historia de banda deseñada. Repartimos as tarefas, tomamos decisións, escribimos diálogos resumidos nos bocadillos, debuxamos... Foi unha actividade moi completa que nos encantou realizar en equipo. O resultado quedou exposto na biblioteca, no taboleiro dos Clubs de Lectura

Finalmente, facemos a devolución dos libros e o empréstito dos seguintes: Alma de elefante, de Andrea Maceiras.

“Macín e os Megalectores” len Esta é a miña historia e terás que crela”

Este mes, o alumnado do club de lectura "Macín e os Megalectores" estivo lendo a obra de Érica Esmorís titulada "Esta é a miña historia e terás que crela", editada por Xerais.

Despois da comida, fixemos un debate sobre o que máis nos gustou da obra e o que menos, debatimos sobre as situacións que se dan na obra e como o feito de contar a verdade ou unha mentira pode cambiar a forma en que nos relacionamos e as cousas que nos pasan. Tamén falamos longo e tendido sobre o final da obra e como o entendimos cada un e cada unha de nós. Para finalizar, xogamos a unha adaptación do xogo Unánimo, o xogo da conexión mental, con palabras relacionadas coa novela. Moitos de nós non coñeciamos o xogo e gustounos un montón xogar con el.

Para o mes que vén, tócanos ler "A letra pequena das cousas", unha obra dramática de José Luis Baños de Ocos que as nosas compañeiras de 6º coñecen moi ben.

“@s amig@s de Macín” len A letra pequena das cousas

Este mes, no club de lectura de 6º de EP "@s amig@s de Macín" limos "A letra pequena das cousas", de José Luis Baños de Cos e ilustrado por Ana Tasende. Trátase dunha obra teatral que adaptamos para facer en teatro radiofónico. Tomando como referencia a obra, a mestra Fátima fixo unha escaleta adaptándoa para a radio, sinalando diferentes efectos de son e músicas que íamos incluír posteriormente. O alumnado, durante as festas de Nadal, estivo practicando na casa a lectura dramatizada da obra para poder realizala na radio escolar. Repartimos os papeis, recordamos todo o aprendido nas sesións de formación de Radio Espora e con Isidoro Valerio e puxémonos mans á obra. A mestra Fátima actuou de narradora e introduciu a obra e o alumnado interpretou os diferentes papeis e manexou a mesa de son e o programa de gravación.

Agora só nos queda o proceso de edición. Esperamos compartir neste espazo proximamente o resultado, posto que contamos coa autorización da Editorial Galaxia para difundir este podcast da súa obra. Para finalizar a sesión, realizamos al fin as nosas chapas identificativas do club de lectura co noso nome e o noso logo.