Pechamos o club de lectura de 5º e 6º de EP nunha sesión conxunta

Esta tarde pechamos, por este curso, o noso club de lectura “Maciñeira de Libros” nunha sesión conxunta dos clubs de 5º e 6º de Educación Primaria. Para celebrar o peche desde curso tan intenso en lecturas e actividades encargamos comida para compartir unha xornada do máis especial. Mentres esperábamos pola comida, o alumnado membro cubriu unha pequena enquisa de valoración para poder seguir mellorando no noso club de lectura.

Despois da sobremesa, gravamos entre todos e todas un novo podcast para Radio Belelle; neste caso, tratouse dun programa-tertulia en que o alumnado membro dos clubs compartiu as súas experiencias sobre o vivido neste curso e os seus desexos para o futuro. Foi unha conversa moi interesante e fermosa, onde saíron pensamentos e sentimentos  compartidos e, por suposto, unha chea de títulos de libros. Podedes escoitar o programa aquí.

Finalmente, o club de lectura de 5º de EP “Macín e os Megalectores” enterrou a cápsula do tempo que estiveron preparando na última sesión a raíz da lectura de O enigma de Sempreviva, de Andrea Maceiras. O alumnado de 6º de EP “@s amig@s de Macín” compartiu con eles e elas esta experiencia, recordando a súa propia do curso pasado.

As mestras que levamos este curso os clubs de lectura, Fátima e Lidia, estamos realmente satisfeitas e orgullosas das actividades realizadas e da implicación do alumnado e queremos agradecerlles que sempre estiveram dispostos e dispostas a todas as iniciativas que se nos ocorreron. Longa vida aos clubs de lectura!

Teatro radiofónico

Como sabedes, o Club de lectura "@s amig@s de Macín" realizou unha adaptación radiofónica da obra de teatro A letra pequena das cousas, de Jose Luis Baños de Cos, editado por Galaxia.

Contamos co permiso expreso da editorial tanto para a realización da adaptación como para a publicación da plataforma iVoox e no blog da biblioteca. Despois dunha edición básica, podedes escoitar o noso podcast desde xa!

O alumnado de 6ºEP participa no VIII Concurso de Podcast - Radio na Biblio

Como sabedes, este curso botamos a andar a nosa radio escolar - Radio Belelle -, ao abeiro  do programa Radio na Biblio, polo que, aproveitando a formación recibida polo alumnado e o profesorado, decidimos participar no VIII Concurso de Pódcast - Radio na Biblio para o curso 2025/26.

Este concurso ten como obxectivo divulgar e poñer en valor as persoas homenaxeadas no Día das Letras Galegas. Este ano homenaxeamos a Begoña Caamaño, polo que escribimos e gravamos un podcast en que entrevistamos a persoas vencelladas coa súa vida persoal, así como ás mulleres protagonistas dos seus libros. 

Aínda que o noso podcast non resultou premiado nesta ocasión, queremos compartilo con toda a comunidade educativa desde a nosa conta de Ivoox. Pero tamén podedes escoitalo aquí:

 

Seguimos transformando espazos

Pouco a pouco, a nosa biblioteca vai transformándose para adaptarse ás novas actividades que nela se desenvolven. Non é só un espazo para ler ou consultar libros: tamén é un lugar onde crear, investigar, comunicar e aprender de moitas maneiras diferentes.

Neste curso incorporamos novo mobiliario para a radio escolar grazas ao programa Radio na Biblio. Con este equipamento contamos cun espazo máis cómodo e organizado para preparar e gravar os nosos programas, facer entrevistas, recomendar lecturas ou compartir todo aquilo que queremos contar coa comunidade educativa.

Ademais, grazas á dotación económica do programa Biblioteca Creativa, a biblioteca conta agora cun croma, un recurso que nos permitirá crear vídeos e desenvolver novas propostas relacionadas coa comunicación audiovisual. Seguro que será unha ferramenta moi útil para presentar traballos, gravar pequenas pezas ou dar forma a proxectos que combinen creatividade e aprendizaxe.

Estas melloras axúdannos a seguir facendo da biblioteca un espazo vivo e versátil, que se adapta ás necesidades do centro e ofrece novas oportunidades para que o alumnado participe, experimente e aprenda.

Seguimos medrando e enchendo a biblioteca de novos proxectos!!!

O profesorado de Maciñeira remata a formación de Radio na Biblio

Hoxe, o profesorado de Maciñeira tivemos a última sesión de formación en Radio na Biblio con Isidoro Valerio, grazas ao Plan de Formación Permanente do Profesorado, dentro do itinerario de Polos Creativos, coordinado polo Centro de Formación e Recursos de Ferrol. Nesta última sesión repasamos todos os contidos aprendidos nas sesións anteriores, ademais de resolver dúbidas concretas do profesorado, unha vez que empezamos proñer en práctica as aprendizaxes desenvolvidas grazas a esta formación. Desde aquí queremos agradecera Isidoro Valerio a súa paciencia e a súa profesionalidade, así como ao CFR pola súa coordinación neste aspecto. Esperamos, grazas a estes coñecementos, que a nosa Radio Belelle vaia crecendo pouco a pouco e podamos compartila con toda a comunidade educativa.

O alumnado de 5º e 6º grava os seus primeiros pódcast

Despois da formación recibida con Radio Espora, o alumnado de 5º e 6º de Educación Primaria iniciou nas súas titorías o deseño e escritura de pódcast para Radio Belelle. En equipos cooperativos escribiron as escaletas e gravaron os seus programas na radio escolar. 

Despois, traballaron na edición dos mesmos e publicáronse no perfil de iVoox de Rádio Belelle. Xa os tedes dispoñibles nas seguintes ligazóns:

La importancia de la Radio Escolar

Las matemáticas en la radio

 

O profesorado de Maciñeira continúa formándose en Radio na Biblio

Como xa sabedes, na Biblioteca de MAcín do CEIP de Maciñeira estamos inmersos no programa Radio na Biblio e este martes o profesorado recibiu a segunda sesión de formación en radio escolar da man de Isidoro Valerio, por medio do Plan de Formación Permanente do Profesorado, dentro do itinerario de Polos Creativos, coordinado polo Centro de Formación e Recursos de Ferrol. Nesta segunda sesión de formación, ademais de recordar os pasos máis importantes á hora de realizar unha gravación dun podcast coa nosa mesa de son e o programa Audacity, aprendimos tamén a editar unha gravación unha vez realizada, para poder incluír música ou efectos de son. Recordamos asimesmo a forma de emprego da música comercial e a libre de dereitos e as distintas plataformas de audio nas que atopar ditas músicas e efectos.

Ademais, fixemos novas probas de gravación de podcast e recibimos consellos moi útiles á hora de empregar os micrófonos, utilizar a mesa de son etc.

Como claustro, estamos moi motivados coa incorporación da radio escolar "Radio Belelle" e estamos xa comezando a traballar con elas nas titorías e en outras actividades.

“@s amig@s de Macín” len A letra pequena das cousas

Este mes, no club de lectura de 6º de EP "@s amig@s de Macín" limos "A letra pequena das cousas", de José Luis Baños de Cos e ilustrado por Ana Tasende. Trátase dunha obra teatral que adaptamos para facer en teatro radiofónico. Tomando como referencia a obra, a mestra Fátima fixo unha escaleta adaptándoa para a radio, sinalando diferentes efectos de son e músicas que íamos incluír posteriormente. O alumnado, durante as festas de Nadal, estivo practicando na casa a lectura dramatizada da obra para poder realizala na radio escolar. Repartimos os papeis, recordamos todo o aprendido nas sesións de formación de Radio Espora e con Isidoro Valerio e puxémonos mans á obra. A mestra Fátima actuou de narradora e introduciu a obra e o alumnado interpretou os diferentes papeis e manexou a mesa de son e o programa de gravación.

Agora só nos queda o proceso de edición. Esperamos compartir neste espazo proximamente o resultado, posto que contamos coa autorización da Editorial Galaxia para difundir este podcast da súa obra. Para finalizar a sesión, realizamos al fin as nosas chapas identificativas do club de lectura co noso nome e o noso logo.

 

O alumnado de 5º e 6º aprendemos a usar a radio

Onte e hoxe o alumnado de 5º e 6º de Educación Primaria fixo un obradoiro de formación en Radio na Biblio da man de Pablo, de Rede Espora. 

Despois de recibir unhas cantas nocións teóricas sobre a radio, os seus elementos, os programas que podemos empregar e diferentes consellos, puidemos practicar, por equipos, e gravar os nosos propios programas de radio. 

Previamene a esta sesión estivéramos redactando as nosas escaletas na aula. Traballamos arreo, xa que tivemos que documentarnos moito para elaboralas. Pero hoxe foi o día no que tocaba poñernos na pel de locutores e técnicos de son para gravar os podcast.

Gustounos moitísimo este obradoiro e non paramos de pensar nas inmensas posibilidades que a radio nos pode abrir na escola. Estamos desexando comezar e facer que a radio da Biblioteca de Macín sexa unha realidade!

O profesorado de Maciñeira fórmase en Radio na Biblio

Desde finais do curso pasado, a Biblioteca de Macín conta con equipamento de radio grazas ás dotacións de Polos Creativos, polo que este curso animámonos a participar no programa Radio na Biblio. 

Deste xeito, o profesorado do CEIP de Maciñeira comezamos esta tarde a formarnos en radio escolar da man de Isidoro Valerio, presentador do programa de radio Voces de Ferrol. Esta é unha das iniciativas do Plan de Formación Permanente do Profesorado do noso centro, coordinado polo Centro de Formación e Recursos de Ferrol. 

Nesta primeira sesión, aprendimos como funciona a nosa emisora de radio e o programa informático para gravar os nosos primeiros podcasts, coñecemos os distintos elementos da emisora e cómo empregalos e recibimos consellos técnicos para o uso dos micrófonos.

Tamén aprendimos certas nocións de edición de audio, o emprego de uso de música comercial e/ou libre de dereitos, as distintas formas de compartir podcasts en aplicacións específicas ou redes sociais e incluso, realizar entrevistas radiofónicas mediante chamadas por mensaxería.

Estamos desexando aprender máis e lanzar ao ar a nosa radio escolar. De momento, xa temos novo logo, ainda que conservamos o nome da antiga radio escolar do cole de Maciñeira: RadioBelelle.

Biblioteca Creativa e Radio na Biblio

Non podemos estar máis felices! 

Fomos admitidas nos programas da Asesoría de Bibliotecas Escolares de Biblioteca Creativa e Radio na Biblio!!!

Coa dotación económica de ambos programas poderemos, por unha banda, dotar á biblioteca dun espazo creativo cos materiais necesarios para desenvolver iniciativas que permitan a experimentación, a creación e a investigación e, por outra, a posta en marcha da radio escolar e a realización de obradoiros de formación para o alumnado neste eido.

Isto si que é un bo alicerce para poder ofrecerlle á nosa comunidade educativa mellores recursos e un punto de encontro ao redor da alfabetización informacional e mediática. E só é comezo! Preparad@s???

Unha biblioteca renovada!

Despois dun intenso traballo ao longo do verán, a nosa biblioteca abre as súas portas completamente renovada e preparada para converterse nun auténtico centro de aprendizaxe, creación e encontro para toda a comunidade educativa.

A transformación comezou coa ampliación do espazo, que agora duplica a súa superficie, permitíndonos ofrecer novos ambientes e mellorar a organización dos recursos. Esta renovación veu acompañada da incorporación de novo mobiliario, pensado para facer da biblioteca un lugar máis cómodo, funcional e acolledor para todo o alumnado.

Un dos obxectivos principais foi adaptar os espazos ás necesidades dos distintos niveis lectores. Así, actualizamos e reorganizamos a sección destinada aos prelectores e primeiros lectores, creando un entorno atractivo que favoreza o descubrimento dos libros desde as primeiras idades. Tamén reubicamos os fondos para lectores autónomos e expertos, facilitando o acceso ás lecturas máis axeitadas para cada etapa.

Entre as novidades destaca a creación dunha sección específica de cómic, ampliando considerablemente os fondos dispoñibles para todos os niveis lectores e dando resposta ao crecente interese do alumnado por este formato.

A ampliación da biblioteca permitiunos tamén reorganizar os fondos de consulta, incorporando puntos de acceso a internet con ordenadores e outros dispositivos móbiles que facilitan a busca, selección e uso da información, competencias fundamentais na sociedade actual.

Pero a nosa biblioteca é moito máis que un espazo para ler. Queremos que sexa tamén un laboratorio de ideas e de creación. Por iso, reorganizamos os recursos de robótica, os xogos educativos, o recuncho de impresión 3D e a cortadora láser, integrándoos nun espazo que fomente a experimentación, a resolución de problemas e o desenvolvemento da creatividade.

Ademais, incorporamos dous novos recunchos que amplían as posibilidades de aprendizaxe e expresión do alumnado: o espazo de radio escolar e o recuncho do croma, que permitirán desenvolver proxectos de comunicación, creación audiovisual e traballo colaborativo.

Comeza así unha nova etapa para a nosa biblioteca, que aspira a ser un verdadeiro fervedoiro de aprendizaxes arredor da lectura, da escritura e do acceso á información, pero tamén un lugar onde as ideas medran, os proxectos cobran vida e a creatividade atopa o seu espazo.

Convidamos a toda a comunidade educativa a descubrir e gozar desta renovada biblioteca, un espazo vivo que seguirá medrando coas achegas, intereses e ilusións de todas e todos.