Primeira semana de retos STEAM na nosa biblio!

Comezamos cunha dobre proposta de retos STEAM para facer no tempo de recreo na biblioteca. Grazas aos nosos voluntarios de biblioteca, que estiveron moi pendentes de todo o que facían os máis pequenos do cole, todos os que se pasaron pola biblioteca puideron realizar estes dous experimentos.

A través destas infografías e seguindo os seus textos instrutivos  puidemos realizar estas dúas experiencias baseadas nas propiedades da luz e nas reaccións químicas sinxelas.  

E aínda que os experimentos parecen doados, hai moitas variables que ter en conta. Pouco a pouco imos perfeccionando as nosas accións e sacando conclusións dos feitos que imos observando.

Ademais as preguntas STEAM ao final nos axudan a dirixir o foco nas nosas investigacións posteriores, ben sexa na casa pola nosa conta ou na escola, nas titorías de cada grupo.

A verdade é que a nosa biblioteca estase a converter nun verdadeiro laboratorio de ideas, un lugar no que aprender a través da experimentación, pero tamén grazas aos procesos de investigación, libres ou dirixidos, que se dan nela.

Ser quen de realizar unha pequena experiencia de forma autónoma, pon en valor as nosas capacidades. Ensínanos tamén a ser resilentes cos que teñen dificultades, aprendendo a prestar a axuda xusta, acompañando o proceso dos que aínda están aprendendo. E isto é unha grande aprendizaxe que levaremos con nós para toda a vida. Porque as bibliotecas son tamén viveiros de cidadanía!