Os Maios en Albarón

Un ano máis, o alumnado dos distintos centros educativos de Neda participamos na celebración da Festa dos Maios, unha actividade promovida polo Concello que compartimos co CEIP San Isidro e a Semente Trasancos.

A xornada desenvolveuse na Arboleda de Albarón, que se encheu de cor, natureza e creatividade grazas ás composicións florais elaboradas polo alumnado. A decoración deste espazo converteuse nunha forma de expresión colectiva na que a imaxinación e o traballo en equipo foron os grandes protagonistas.

Durante a celebración, tamén gozamos dunha actividade dinamizada pola Gua Gua, que achegou momentos de diversión, participación e aprendizaxe compartida.

Como broche final, o Concello agasallounos cos xa tradicionais bolos preñados, que puidemos degustar nun ambiente festivo e de convivencia, reforzando o valor das tradicións gastronómicas como parte esencial da nosa cultura.

Esta celebración dos Maios permitiunos comprender que a tradición non é algo estático, senón unha realidade viva que se renova cada ano coa participación das novas xeracións. A través da arte, da natureza e da colaboración entre centros, o alumnado viviu unha experiencia que combina aprendizaxe, identidade e creatividade.

Unha xornada na que a primavera, a cultura e a comunidade camiñaron da man.

Obradoiros de ciencia

O alumnado do 3º ciclo de Primaria participou nun interesantísimo obradoiro de ciencia organizado grazas ao CITEEC e promovido polo Concello de Neda, nunha proposta educativa que achegou a ciencia dun xeito práctico, manipulativo e moi motivador.

Ao longo da actividade, o alumnado converteuse en pequeno equipo de investigación, explorando diferentes ámbitos científicos a través da experimentación directa. Puideron experimentear coa hidráulica, onde puideron observar como a auga se comporta en distintos sistemas e como se pode empregar para transmitir forza e movemento. A través de montaxes sinxelas e sorprendentes, comprenderon mellor conceptos que adoitan parecer complexos cando se explican só na aula.

Outro dos talleres estivo dedicado á arquitectura de estruturas, no que o alumnado tivo que enfrontarse ao reto de construír e deseñar estruturas estables. A creatividade, o traballo en equipo e a capacidade de resolver problemas foron fundamentais para conseguir deseños resistentes, aprendendo así principios básicos da enxeñaría e da construción.

Tamén houbo espazo para a exploración das propiedades dos materiais, onde puideron tocar, comparar e experimentar con diferentes elementos para descubrir como se comportan ante presión, peso ou deformación. Esta actividade espertou moita curiosidade e permitiu comprender que cada material ten características propias que determinan o seu uso no mundo real.

Estes obradoiros foron unha oportunidade magnífica para achegar a ciencia á vida cotiá, fomentando a curiosidade, o pensamento crítico e o gusto por aprender facendo. A experiencia demostrou que a ciencia non só se estuda, senón que tamén se vive, se constrúe e se comparte.

Unha xornada chea de descubrimentos que, sen dúbida, deixa pegada no camiño do noso alumnado como pequenos e pequenas investigadoras.

Coñecemos parte da nosa historia: A revolta das pedradas

A Revolta das Pedradas de 1918 en Neda non foi só un estalido de rabia contra a carestía da vida, senón unha lección monumental de afouteza protagonizada polas mulleres da vila. Nun contexto de fame e inxustiza, as nedenses non agardaron por permisos nin liderados alleos; foron elas quen, con pedras nas mans e unha determinación inquebrantable, encabezaron a loita pola dignidade das súas familias fronte á especulación do gran. 

Esta coraxe histórica conecta directamente co espírito do movemento feminista actual e as mobilizacións do 8M, lembrándonos que a loita pola xustiza social sempre tivo rostro de muller. Hoxe, ao reivindicarmos o noso espazo na historia, honramos a aquelas mulleres de Neda que, moito antes das proclamas modernas, xa sabían que a unión e a acción directa son as ferramentas máis potentes para transformar o mundo.

Así, durante o mes de marzo, o alumnado do 2º ciclo de Primaria traballou sobre este feito da nosa historia local. A través dunha presentación lembraron a estas mulleres de Fene, Neda e Narón que lideraron nos seus inicios a revolta chamada “A Revolta das Pedradas”. 

Falaron da importancia de igualdade de dereitos de homes e mulleres e a continuación debuxaron unha "pedra" nunha folla, na que escribiron dentro un dereito da muller. Enrugáronna como se fose unha pedra e lanzaron a bola de papel ao berro de:

“Pola igualdade de dereitos entre homes e mulleres!”

En definitiva, a Revolta das Pedradas é moito máis que unha efeméride nun libro de historia local; é o fío violeta que une o noso pasado coas nosas aspiracións de futuro. Ao lembrarmos daquelas veciñas de Neda, non só rescatamos do esquecemento a súa valentía, senón que reafirmamos o compromiso de seguir batallando contra as desigualdades que aínda hoxe persisten. 

Que o eco daquelas pedras lanzadas con afouteza nos sirva de alento cada 8 de marzo e cada día do ano, para entender que a xustiza social e o feminismo son camiños que se constrúen coa mesma determinación que elas amosaron na ribeira do río. 

Porque as mulleres de Neda onte abriron a fenda, e as de hoxe seguimos ensanchando o camiño.

Ler conta moito, da man do Concello de Neda

Un ano máis puidemos gozar do ciclo de animación infantil "Do cole á biblio" que o Concello de Neda promove co gallo do Día das Bibliotecas para a rapazada escolarizada no noso concello. A iniciativa conta co apoio da Rede de bibliotecas de Galicia no marco do programa “Ler conta moito”.

O luns, foi a quenda do alumnado de 4º, 5º e 6º de Primaria, quen asistiu ao espectáculo de malabares, equilibrios e clown do “Circo da Biblioteca”, con Dani Blanco, na Casa da Cultura de Neda.

O martes foi a quenda da rapazada de 1º, 2º e 3º de primaria, quen tivo ocasión de desfrutar das historias e dos trucos do Mago da Boina e de Nami no espectáculo “A maxia dos libros”.

E o mércores, foi o alumnado de Infantil quen puido gozar do contacontos musical “Os rizos de Lía", coas historias e as cancións de Paty Lesta.

Grazas ao Concello de Neda pola iniciativa!

Teatro con G

Hoxe achegámonos ata o Teatro Jofre de Ferrol para gozar coas obras de teatro do CEIP A Laxe, o CPI de Atios e os nosos veciños do CEIP San Isidro de Neda, dentro do ciclo de teatro por e para escolares Teatro con G, que promove a Coordenadora de Equipos de Normalización Lingüística de Ferrolterra, nun ano no que as Bibliotecas Escolares saen á escena!

 

Galicia sabe a mar

A campaña Galicia sabe aMar, impulsada pola Conselleríado Mar, levou este venres o mellor sabor das rías galegas ao noso cole. A presenza dunha foodtruck no patio da escola brindounos a oportunidade de degustar os diferentes petiscos elaborados con produtos de mar. No noso caso foron:

• Humus de fabas de Lourenzá e Mexillón de Galicia á carbonara de mar.
• E croqueta de chopo de pescadeRías e ali oli de pementos de Herbón.

A iniciativa busca promover o consumo de peixe entre a rapazada falándolles da importancia de incorporalo á súa dieta coma unha opción saudable de alimentarnos. Xa se sabe que hai que comer ben para medrar mellor. A iniciativa busca promover o consumo entre a xente máis nova nun momento de progresivo descenso da presenza destes alimentos na cesta da compra das familias.

Estamos de noraboa!

Acabamos de coñecer a concesión do Selo de Biblioteca Escolar Solidaria, que recoñece o traballo das bibliotecas que traballan de forma salientable a compensación de desigualdades e fomentan o voluntariado cultural e social entre os integrantes da comunidade escolar, dotado con 1500€ para a nosa biblioteca.

Premia así o traballo de toda a comunidade educativa - voluntariado; familias colaboradoras; profesorado e outros axentes - en prol dunha forma de ser biblioteca atenta ás necesidades de todos os seus integrantes en materia de lectura e de acceso ao coñecemento, pero tamén de busca de solucións para problemas reais baixo o enfoque do desenvolvemento sustentable.

Un sinceiro agradecemento a todas as persoas que contribuistes a logralo grazas ao voso traballo desinteresado.

Hoxe estamos moi contentas, pero sobre todo estamos agradecidas por tecer unha rede tan forte de lazos na nosa comunidade.

Parabéns a todas vós!

Maios en Albarón

Albarón encheuse un ano máis de flores coa celebración dos maios de Neda, unha festa tradicional recuperada nos últimos anos na nosa localidade. 

Todo o alumnado e  o profesorado dos coles de Neda son os protagonistas desta xornada festiva impulsada polo concello, colaborando nas creacións florais montadas ao redor das árbores da feira na que gozamos xogando e brincando nesta colorida mañá.

Tamén houbo houbo tempo para degustar os habituais boliños preñados aos que nos convidou o Concello. Moitas grazas!

Que vivan os maios de Albarón!!!

Obradoiros de resolución de conflictos con Andrea Bechlian

O alumnado de 4º, 5º e 6º de primaria participou ao longo de todo o mes nos obradoiros de resolución de conflitos e prevención do acoso escolar, que impulsa o Concello de Neda co apoio de Sanidade. 

A actividade, impartida por Andrea Bechlian, psicóloga e educadora de disciplina positiva, persegue ensinar á rapazada a lidar coas discrepancias de forma respectuosa, e axudar a identificar e previr situacións de acoso nas aulas. 

A concelleira de Educación, Ángeles Puentes, asistiu a unha das sesións coas que arrincaba a iniciativa no centro.

Obradoiro sobre micromachismos, para unha igualdade real

Grazas ao Concello de Neda, puidemos gozar cun obradoiro sobre micromachismos, dentro do programa "Neda, pola igualdade real" co gallo do Día da Muller.

A nosa biblioteca acolleu esta actividade que busca fomentar a igualdade, e propiciar que a rapazada reflexione sobre todos eses pequenos xestos e expresións sexistas que contribúen a perpetuar os roles de xénero.

Tras avaliar os nosos coñecementos sobre estes catro conceptos elementais en materia de igualdade, poñemos tamén a lupa na nosa contorna familiar a través dunha actividade de rol-playing.

Tamén analizamos como moitas das letras das cancións seguen a trasladar mensaxes machistas e como nos contidos das redes sociais más usadas se produce unha hipersexualización.

Antes de marchar deixáronnos unha caixa malva na que ir deixando pegadas da nosa loita contra os micromachismos. Seremos quen de enchela?