Contra a desinformación: Bibliotecas

 

O lema deste ano, "Contra a desinformación: bibliotecas", pretende destacar o papel fundamental que desempeñan todas as tipoloxías de bibliotecas (públicas, escolares, universitarias, especializadas e nacionais/rexionais) na loita contra a desinformación.

A biblioteca escolar é a primeira biblioteca que nos aprende a usar outras bibliotecas e a que o pon en contacto á infancia con eses outros espazos do coñecemento e do lecer: as bibliotecas públicas. 

Neste curso no que duplicamos espazos e diversificamos os recursos da nosa Biblioteca, temos como obxectivo lograr unha maior apertura á comunidade educativa, para se converter nunha ferramenta ao seu servizo. 

Isto trae consigo a necesidade de mediación dos axentes implicados: 

• Por unha parte, as mestras, que actúan como mediadoras de contidos e apoio aos usuarios na procura de información a través de fontes fiables e contrastadas.

• Por outra banda, o noso Equipo de Biblioteca, que fai unha labor fundamental para lograr o bo funcionamento do servizo co acompañamento dos máis pequenos nos tempos de lecer.

• E outros membros da comunidade educativa, como as familias colaboradoras ou a ANPA da escola, que amplian coñecementos sobre os proxectos desenvolvidos nas aulas ou organizan actividades de extensión cultural.

E para celebrar esta sorte nosa, no Día das Bibliotecas, pasamos pola nosa biblio e nela puidemos estrear a nosa zona STEAM, na que se incorporan os fondos de consulta e outros recursos tecnolóxicos, e na que, seguindo un texto instrutivo, fixemos unhas chapas para conmemorar este día.

#Bibliotecas_para_todos_os_públicos

#contra_a_desinformación_Bibliotecas  

Ler conta moito, da man do Concello de Neda

Un ano máis puidemos gozar do ciclo de animación infantil "Do cole á biblio" que o Concello de Neda promove co gallo do Día das Bibliotecas para a rapazada escolarizada no noso concello. A iniciativa conta co apoio da Rede de bibliotecas de Galicia no marco do programa “Ler conta moito”.

O luns, foi a quenda do alumnado de 4º, 5º e 6º de Primaria, quen asistiu ao espectáculo de malabares, equilibrios e clown do “Circo da Biblioteca”, con Dani Blanco, na Casa da Cultura de Neda.

O martes foi a quenda da rapazada de 1º, 2º e 3º de primaria, quen tivo ocasión de desfrutar das historias e dos trucos do Mago da Boina e de Nami no espectáculo “A maxia dos libros”.

E o mércores, foi o alumnado de Infantil quen puido gozar do contacontos musical “Os rizos de Lía", coas historias e as cancións de Paty Lesta.

Grazas ao Concello de Neda pola iniciativa!

Para celebrar o Día das Bibliotecas, a "B.E. sae á escena"

Grazas ao Concello de Neda, celebramos ao longo desta semana o Día das Bibliotecas ao grande, grazas ao programa “Do cole á biblio”. Esta iniciativa incluiu tres espectáculos para todos os escolares do concello e desenvolveuse co apoio do programa “Ler conta moito” da Rede de bibliotecas públicas de Galicia.

O luns 21, o alumnado de 4º, 5º e 6º de primaria gozou do espectáculo de ilusionismo “En samaín toca…maxia”, con Óscar Fernández, de Magia en la manga.

O martes 22, foi a quenda do alumnado de infantil, quen gozou movendo o esquelete con Paco Nogueiras e o seu “Brinca vai. De aquí a acolá”. 

 

E finalmente, o mércores 23 o alumnado de 1º, 2º e 3º de primaria saboreu unha chea de “Contos de lobo”, unha proposta teatral interactiva de Ghazafelhos, cun toque de maxia e de circo.

E con todas estas propostas, nas que a B.E. sae a escena, puidemos gozar da nosa cultura grazas ao Concello de Neda e a Rede de Bibliotecas de Galicia. Foi unha semana fantástica!

A biblioteca escolar, por un futuro sostible

O pasado mes de setembro, visitáronnos representantes do Grupo Naturalista Hábitat, dentro das actividades programadas para o Proxecto Ríos e que se apoia na Biblioteca Escolar, especialmente este curso, no que o lema para o Día das Bibliotecas é "Por un futuro sostible".

O alumnado de 1º e 2º de Educación Primaria levou a cabo un obradoiro de macroinvertebrados acuáticos, mentres que o alumnado de 3º de Educación Primaria realizou o obradoiro de medicións fisicoquímicas da auga do río Belelle. 

Achegámonos ao noso río e recoller mostras, analizar a súa auga e coñecer a fauna macroinvertebrada que habita nel. Grazas a estas experiencias puidemos achegarnos un pouco máis á nosa contorna para darnos conta da importancia do seu coidado se queremos que o noso futuro sexa sostible.

Ao longo do curso realizaremos novas experiencias da man do Grupo Naturalista Hábitat. A verdade é que xa estamos desexando que volvan!