Día da Muller e a Nena na ciencia

Cada 11 de febreiro celebramos o Día Internacional da Muller e a Nena na Ciencia, unha data que nos invita a mirar arredor e preguntarnos algo importante: quen imaxina, constrúe e transforma o mundo no que vivimos? A resposta debería ser sinxela: todas as persoas. Pero a realidade dinos que aínda queda moito camiño para conseguir unha presenza igualitaria das mulleres nos ámbitos científicos e tecnolóxicos.

Por iso, desde a nosa biblioteca escolar queremos seguir dando visibilidade ás mulleres investigadoras, enxeñeiras, matemáticas, programadoras e científicas que, co seu traballo, abren portas ás novas xeracións. Porque cando unha nena ve a outra muller investigando, creando ou liderando proxectos tecnolóxicos, entende que ela tamén pode facelo.

Neste contexto enmárcase a nosa visita ao CITENI: Centro de Investigacións en Tecnoloxía Naval e Industrial, unha experiencia que nos permitiu achegarnos ao mundo da innovación naval e industrial desde dentro. Durante a xornada, o alumnado puido coñecer proxectos vinculados á tecnoloxía, á investigación aplicada e ao desenvolvemento naval e industrial, descubrindo como a ciencia e a enxeñaría forman parte da nosa vida diaria e tamén do futuro da nosa comarca.

 🏎️ No @limferrol experimentaron cun simulador de motor eléctrico: probaron como cambia o seu comportamento segundo as decisións tomadas ao volante.

💨✈️ No laboratorio de Mecánica de Fluídos gozaron dun dos momentos máis divertidos da mañá, grazas ao túnel de vento!: entre risas e peiteados revolucionados, aprenderon a teoría que fai posible que os avións voen.

 🚢🌊 E xa no Canal de Experiencias Hidrodinámicas convertéronse en auténticos enxeñeiros navais: a través de modelos feitos con plastilina averiguaron por qué un barco flota e navega sen afundirse.

Pero un dos aspectos máis enriquecedores da visita foi poder escoitar e coñecer o traballo de profesionais que desenvolven a súa carreira nun ámbito historicamente moi masculinizado. Ver mulleres formando parte activa destes equipos de investigación axuda a romper estereotipos e a construír referentes reais e próximos. 

A ciencia non entende de xénero, pero as oportunidades ás veces si estiveron condicionadas por el. Por iso é tan importante seguir celebrando días como este: para lembrar o talento de tantas mulleres invisibilizadas ao longo da historia e para impulsar vocacións científicas entre as máis novas.

Desde a biblioteca seguiremos apostando por lecturas, actividades e experiencias que esperten a curiosidade, fomenten o pensamento crítico e animen ao alumnado a explorar o mundo da ciencia sen límites nin etiquetas. Porque o futuro tamén se escribe en feminino. E porque cada descubrimento comeza, moitas veces, cunha pregunta feita na aula… ou nunha biblioteca.

Día da Muller e a Nena na ciencia

Para celebrar o Día da Nena e a muller na ciencia, no que ademais de render homenaxe ás mulleres científicas do pasado pensamos que é fundamental que as nenas - e os nenos tamén - teñan referentes femininos actuais nas carreiras científicas STEM (ciencias, tecnoloxía, enxeñería e matemáticas), inspirando así ás novas xeracións de nenas para que poidan interesarse pola ciencia desde idades temperás, reforzando a mensaxe de que a ciencia é un campo aberto a toda a sociedade, sen distinción de xénero.

Se premes nesta imaxe podes acceder á selección de libros sobre mulleres e ciencia que tes dipoñible para o empréstito dixital. Pasa pola biblio o martes pola tarde para saber como acceder a e-lbe.2

Por iso, veu darnos unha charla e a falar do seu traballo, Beatriz Rodríguez Martínez, enxeñeira química que traballa para a UVigo. 

Bea fixo tres sesións, cada unha delas adaptada aos niveis dos participantes. Falounos dalgunhas mulleres científicas como a física Lise Meitner, que descubriu a fisión nuclear pero lle deron o Premio Nobel ao seu compañeiro de traballo; a bioquímica Katalín Karikó, que estudou o ARN e grazas aos seu estudios se puideron facer as vacinas contra o COVID; a enxeñeira, médico e astronauta Mae Jemison, que desenvolveu un sistema de telecomunicacións co fin de mellorar o coidado médico en países non desenvolvidos; ou a enxeñeira industrial española Elena García Armada, que creou o primeiro exoesqueleto pedíatrico do mundo para nenos e nenas con patoloxías neuromusculares e parálise cerebral.

Ademais, falounos do seu traballo no laboratorio da Universidade dando unha nova vida a desfeitos alimentarios como mondas de pataca, ósos de aguacate, follas de eucalipto... que son considerados subprodutos para obter bioetanol e outros produtos químicos.

Pero non só iso, amosounos como facer unha extración e unha filtración, a utilizar unha micropipeta e a facer esferificacións.

Grazas Bea por compartir o teu tempo con nós e contarnos a túa experiencia. Tal vez, hoxe espertaches a motivación polas carreiras científicas nas nenas do noso cole, porque... 

A ciencia é cousa de todas.

A ciencia non ten xénero. 

Ti tamén podes ser científica.

#nomorematildas

é unha asociación sen ánimo de lucro que quere visibilizar o papel das mulleres na ciencia para que serva de inspiración ás nenas de hoxe que serán as científicas do mañá.

Por moitas máis mulleres na ciencia, reivindiquemos o

11F: Día da Muller e a Nena na Ciencia.

Novembro: mes da ciencia en galego nas Bibliotecas

E no mes de novembro, teremos moita ciencia nas bibliotecas galegas, e por suposto, tamén na nosa biblioteca. Non dubides en vir facer os experimentos e visitar a nosa exposición de Mulleres na ciencia ao longo destas semanas para gozar coa ciencia e aprender moitísimo! 

Te apuntas?

Podes botarlle unha ollada á exposición das Mulleres con Ciencia tamén desde aquí, premendo na seguinte imaxe. E non dubides en participar no xogo detectives sobre a ciencia! 

Desde a Asesoría de bibliotecas escolares realizouse unha recompilación de recursos dixitais, relacionados coa ciencia, en galego, que se pon a disposición de todas as bibliotecas e que podes consultar aquí.

Pola nosa parte, poñemos a disposición de toda a comunidade educativa os nosos fondos sobre ciencia. Como vedes, os máis pequenos do cole, xa están dando boa conta deles! 

Ciencias naturais, mediciña, matemáticas, astronomía, tecnoloxía, enxeñaría, robótica... E a ti? Que che presta?