Biblioteca Escolar + Deseño --> Viaxe á creatividade

Na nosa biblioteca escolar seguimos descubrindo artistas e obras que nos axudan a mirar a creatividade desde perspectivas diferentes. Achegámonos á figura de Judith Scott a través do libro Unbound, unha obra que nos permitiu coñecer o seu universo artístico e a súa particular maneira de crear.

Judith Scott transformaba obxectos cotiáns e materiais sinxelos en esculturas cheas de formas, volumes e texturas. A través de fíos, teas e elementos reutilizados, construía pezas únicas que convidan a observar, imaxinar e interpretar libremente. O seu traballo convértese nunha inspiración perfecta para abordar o deseño e a creatividade desde a experimentación e a liberdade artística.

A partir desta proposta, estamos a crear unha instalación artística na que o alumnado pode explorar como as ideas van tomando forma a través dos materiais, descubrindo que non existen límites únicos para crear. O proceso creativo, a observación e a capacidade de transformar elementos comúns en algo novo son os verdadeiros protagonistas desta experiencia. E desde a biblioteca queremos facilitala. 

Por iso, de aquí ata que remate o curso podes vir a rematar a túa proposta "Unbound" para incorporala á exposición. Anímaste? 

Desde a biblioteca queremos seguir ofrecendo espazos onde a arte, os libros e a creatividade se atopen para fomentar novas maneiras de pensar, deseñar e expresarse. Porque crear tamén é investigar, probar e descubrir o mundo con outros ollos.